ಭಾಸ

ಸುಯ್ಯ್... ಸ್ಸ್....

ಎಂದು ಸದಾ ಸುತ್ತುತ್ತಿದ್ದ ಗಾಳಿ

ಇಂದು ಸದ್ದಿಲ್ಲದೇ ನಿಂತು ಹೋಗಿದೆ |

ಕೇಳದಿದ್ದ ಮೆಟ್ರೋ ಶಬ್ದ

ಈಗ ನಾನೂ ಇಲ್ಲಿದ್ದೇನೆ ಎಂಬಂತೆ

ಗರ್ವದಿಂದ ಗಿರಕಿ ಹೊಡೆಯುತ್ತಿದೆ |

ಹುಚ್ಚು ಬಂದಂತೆ ಕುಣಿಯುತ್ತಿದ್ದ

ಮರದ ರೆಂಬೆ ಕೊಂಬೆಗಳು

ಶಾಕ್ ಹೊಡೆಸಿಕೊಂಡ ಕಾಗೆಗಳಂತೆ

ಸೆಟೆದು ನಿಂತಿವೆ |

ಅರೇ ನಾನಿರುವಲ್ಲಿಯೂ ಹಕ್ಕಿ-ಪಕ್ಷಿಗಳಿವೆ,

ಅದೋ ಮದುವೆಯಾದ ಗಂಡಿನ ಕಷ್ಟವೂ 

ಪಕ್ಕದ ಮನೆಯಿಂದ ಕೇಳುತಿದೆ |

ಒಟ್ಟಿನಲ್ಲಿ, ಬಾಲ ಸುಟ್ಟ 

ಬೆಕ್ಕಿನಂತೆ ತಿರುಗುತ್ತಿದ್ದ ಗಾಳಿಯು ಇಲ್ಲದಾಗಿ

ಹೊಸತೇನೆನೋ ಕಾಣುತಿದ್ದರೂ,

ಅತಿಮುಖ್ಯವಾದುದೇನೋ ಕಳೆದುಹೋಗಿರುವ ಭಾವ

ಭಾಸವಾಗಿದೆ.